ਪੀਏਯੂ ਲੁਧਿਆਣਾ ਵੱਲੋਂ ਵਿਕਸਿਤ ਤਕਨੀਕਾਂ ਦੇ ਵਿਸਥਾਰ ਲਈ ਅੱਜ ਦੋ ਸੰਧੀਆਂ ਤੇ ਦਸਤਖਤ ਕੀਤੇ ਗਏ । ਇਹ ਤਕਨੀਕਾਂ ਵਿੱਚੋਂ ਪਹਿਲੀ ਫ਼ਲਾਂ ਤੋਂ ਸਿਰਕਾ ਤਿਆਰ ਕਰਨ ਦੀ ਵਿਧੀ ਹੈ ਅਤੇ ਦੂਜੀ ਝੋਨੇ ਦੀ ਵਾਢੀ ਸਮੇਂ ਕੰਬਾਈਨ ਹਾਰਵੈਸਟਰ ਨਾਲ ਲਗਾਇਆ ਜਾਂਦਾ ਸੁਪਰ ਸਟਰਾਅ ਮੈਨੇਜਮੈਂਟ ਸਿਸਟਮ ਹੈ । ਇਹ ਦੋਵੇਂ ਸਮਝੌਤੇ ਵਾਈਸ ਚਾਂਸਲਰ ਡਾ. ਬਲਦੇਵ ਸਿੰਘ ਢਿੱਲੋਂ ਦੀ ਹਾਜ਼ਰੀ ਵਿੱਚ ਨਿਰਦੇਸ਼ਕ ਖੋਜ ਡਾ.ਨਵਤੇਜ ਸਿੰਘ ਬੈਂਸ ਵੱਲੋਂ ਦਸਤਖਤ ਕੀਤੇ ਗਏ । ਸਮਝੌਤੇ ਕਰਨ ਵਾਲੀਆਂ ਫਰਮਾਂ ਹਿੱਲ ਰੂਟ, ਆਈਐਮਈ, ਮਾਨੇਸਰ, ਗੁੜਗਾਓਂ ਅਤੇ ਅਰਜਨ ਐਗਰੀ ਵਰਕਸ ਨਾਭਾ ਰੋਡ, ਅਮਲੋਹ ਹਨ । ਇਹਨਾਂ ਫਰਮਾਂ ਵੱਲੋਂ ਉਹਨਾਂ ਦੇ ਅਧਿਕਾਰੀਆਂ ਸ੍ਰੀ ਸ਼ਮਿੰਦਰ ਸਿੰਘ ਬਰਾੜ ਅਤੇ ਸ੍ਰੀ ਰਾਮ ਸਰੂਪ ਨੇ ਸਹੀਆਂ ਪਾਈਆਂ । ਸੀਨੀਅਰ ਮਾਈਕ੍ਰੋਬਾਇਲੋਜਿਸਟ ਡਾ. ਜੀ ਐਸ ਕੋਚਰ ਨੇ ਦੱਸਿਆ ਕਿ ਮਾਈਕ੍ਰੋਬਾਇਆਲੋਜੀ ਵਿਭਾਗ ਫ਼ਲਾਂ ਦੇ ਸਿਰਕੇ ਦੀ ਖੋਜ ਨਾਲ ਸਰਗਰਮੀ ਨਾਲ ਜੁੜਿਆ ਰਿਹਾ ਹੈ । ਗੰਨੇ, ਅੰਗੂਰ ਅਤੇ ਸੇਬ ਦੇ ਰਸ ਤੋਂ ਸਿਰਕਾ ਤਿਆਰ ਕਰਨ ਦੀ ਤਕਨੀਕ ਪੀਏਯੂ ਨੇ ਵਿਕਸਿਤ ਕੀਤੀ ਹੈ ਜਿਸਨੂੰ ਹੁਣ ਪਸਾਰਿਆ ਜਾ ਰਿਹਾ ਹੈ । ਉਹਨਾਂ ਇਹ ਵੀ ਕਿਹਾ ਕਿ ਵਿਭਾਗ ਦਾ ਜ਼ੋਰ ਹੁਣ ਰਵਾਇਤੀ ਫ਼ਲਾਂ ਤੋਂ ਕੁਦਰਤੀ ਤਰੀਕੇ ਨਾਲ ਸਿਰਕਾ ਤਿਆਰ ਕਰਨ ਵੱਲ ਹੈ ਤਾਂ ਕਿ ਬਾਗਬਾਨੀ ਉਤਪਾਦਨ ਵਿੱਚ ਮੁੱਲ ਵਾਧਾ ਕੀਤਾ ਜਾ ਸਕੇ ।
ਵਧੀਕ ਨਿਰਦੇਸ਼ਕ ਖੋਜ ਡਾ. ਅਸ਼ੋਕ ਕੁਮਾਰ ਨੇ ਦੱਸਿਆ ਕਿ ਹੁਣ ਸਮਾਂ ਆ ਗਿਆ ਹੈ ਕਿ ਸਿੰਥੈਟਿਕ ਸਿਰਕੇ ਦੀ ਥਾਂ ਕੁਦਰਤੀ ਅਤੇ ਪੌਸ਼ਟਿਕ ਸਿਰਕਾ ਤਿਆਰ ਕਰਨ ਦੀ ਤਕਨੀਕ ਨੂੰ ਪਸਾਰਿਆ ਜਾਵੇ । ਉਹਨਾਂ ਇਹ ਵੀ ਦੱਸਿਆ ਕਿ ਸੁਪਰ ਐਸਐਮਐਸ ਤਕਨੀਕ ਦੇ ਪਸਾਰ ਲਈ ਹੁਣ ਤੱਕ 120 ਸਮਝੌਤੇ ਕੀਤੇ ਹਨ । ਐਡਜੰਕਟ ਪ੍ਰੋਫੈਸਰ ਡਾ. ਐਸ ਐਸ ਚਾਹਲ ਦੱਸਿਆ ਕਿ ਪੀਏਯੂ ਨੇ 42 ਤਕਨੀਕਾਂ ਦੇ ਪਸਾਰ ਲਈ 188 ਸੰਧੀਆਂ ਤੇ ਦਸਤਖਤ ਕੀਤੇ ਹਨ ਜਿਨ੍ਹਾਂ ਵਿੱਚ ਸਰ੍ਹੋਂ ਦੀ ਹਾਈਬ੍ਰਿਡ ਕਿਸਮ, ਮਿਰਚਾਂ, ਬੈਂਗਣ, ਜੈਵਿਕ ਖਾਦਾਂ, ਪੱਤਾ ਰੰਗ ਚਾਰਗ, ਪਾਣੀ ਪਰਖ ਕਿੱਟ ਪ੍ਰਮੁੱਖ ਹਨ । ਫਾਰਮ ਮਸ਼ੀਨਰੀ ਅਤੇ ਪਾਵਰ ਇੰਜਨੀਅਰਿੰਗ ਵਿਭਾਗ ਦੇ ਸਹਾਇਕ ਇੰਜਨੀਅਰ ਡਾ. ਮਨਪ੍ਰੀਤ ਸਿੰਘ ਨੇ ਪੀਏਯੂ ਸੁਪਰ ਐਸਐਮਐਸ ਦੀ ਵਰਤੋਂ ਨਾਲ ਪਰਾਲੀ ਦੀ ਸਾਂਭ-ਸੰਭਾਲ ਦੀ ਵਿਧੀ ਬਾਰੇ ਜਾਣਕਾਰੀ ਦਿੱਤੀ । ਇਸ ਮੌਕੇ ਨਿਰਦੇਸ਼ਕ ਪਸਾਰ ਸਿੱਖਿਆ ਡਾ. ਜਸਕਰਨ ਸਿੰਘ ਮਾਹਲ, ਡੀਨ ਪੋਸਟ ਗ੍ਰੈਜਏਟ ਸਟੱਡੀਜ਼ ਡਾ. ਜੀ ਕੇ ਸਾਂਘਾ, ਮਾਈਕ੍ਰੋਬਾਇਆਲੋਜੀ ਵਿਭਾਗ ਦੇ ਮੁਖੀ ਡਾ. ਸ਼ੰਮੀ ਕਪੂਰ ਵਿਸ਼ੇਸ਼ ਤੌਰ ਤੇ ਮੌਜੂਦ ਸਨ । |