ਭੂਮੀ ਅਤੇ ਪਾਣੀ ਇੰਜਨੀਅਰਿੰਗ ਵਿਭਾਗ ਦੇ ਸੀਨੀਅਰ ਖੋਜ ਇੰਜਨੀਅਰ ਅਤੇ ਮੁਖੀ ਡਾ. ਰਾਜਨ ਅਗਰਵਾਲ ਨੂੰ ਸਾਇਲ ਕੰਨਜਰਵੇਸ਼ਨ ਸੋਸਾਇਟੀ ਆਫ਼ ਇੰਡੀਆ ਨੇ 2017 ਦਾ ਗੋਲਡ ਮੈਡਲ ਐਵਾਰਡ ਪ੍ਰਦਾਨ ਕੀਤਾ ਹੈ । ਇਹ ਮੈਡਲ 25-27 ਅਕਤੂਬਰ ਤੱਕ ਅਸਾਮ ਐਗਰੀਕਲਚਰਲ ਯੂਨੀਵਰਸਿਟੀ ਜੋਰਹਾਰਟ ਵਿਖੇ 27ਵੀਂ ਰਾਸ਼ਟਰੀ ਕਾਨਫਰੰਸ ਵਿੱਚ ਪ੍ਰਦਾਨ ਕੀਤਾ ਗਿਆ ।
ਡਾ. ਅਗਰਵਾਲ ਭੂਮੀ ਅਤੇ ਪਾਣੀ ਇੰਜਨੀਅਰਿੰਗ ਵਿਭਾਗ ਦੇ ਮੁਖੀ ਹੋਣ ਦੇ ਨਾਲ-ਨਾਲ ਏਆਈਸੀਆਰਪੀ ਦੇ ਪੰਜਾਬ ਵਿੱਚ ਸਿੰਚਾਈ-ਪਾਣੀ ਪ੍ਰਬੰਧਨ ਬਾਰੇ ਪ੍ਰੋਜੈਕਟ ਦੇ ਮੁੱਖ ਨਿਰੀਖਕ ਵੀ ਹਨ । ਜ਼ਮੀਨੀ ਪਾਣੀ ਸੰਬੰਧੀ ਖੋਜ ਦੇ ਨਾਲ-ਨਾਲ ਉਹਨਾਂ ਨੇ ਮੀਂਹ ਦੇ ਪਾਣੀ ਦੀ ਸੰਭਾਲ, ਵਾਤਾਵਰਨੀ ਬਦਲਾਅ ਅਤੇ ਤੁਪਕਾ ਸਿੰਚਾਈ ਖੇਤਰ ਵਿੱਚ ਅਹਿਮ ਯੋਗਦਾਨ ਦੇ ਕੇ ਰਾਜ ਵਿੱਚ ਪਾਣੀ ਦੀ ਸੰਭਾਲ ਲਈ ਮਹੱਤਵਪੂਰਨ ਕਾਰਜ ਕੀਤਾ ਹੈ । ਮੀਂਹ ਦੇ ਪਾਣੀ ਦੀ ਸੰਭਾਲ ਲਈ 150 ਤੋਂ ਵਧੇਰੇ ਢਾਂਚਿਆਂ ਨੂੰ ਡਿਜ਼ਾਇਨ ਕਰਕੇ ਉਹਨਾਂ ਨੇ ਚਾਲੂ ਕੀਤਾ ਹੈ । ਰਾਸ਼ਟਰੀ ਅੰਤਰਰਾਸ਼ਟਰੀ ਪੱਤਰਕਾਵਾਂ, ਅਖਬਾਰਾਂ ਅਤੇ ਕਿਤਾਬਾਂ ਵਿੱਚ ਉਹਨਾਂ ਦੇ 170 ਤੋਂ ਵਧੇਰੇ ਖੋਜ ਪੱਤਰ ਸ਼ਾਮਲ ਹਨ । ਉਹ ਨੈਕ ਕਮੇਟੀ ਦੇ ਮਾਹਿਰਾਂ ਵਿੱਚ ਸ਼ਾਮਲ ਹੋਣ ਦੇ ਨਾਲ-ਨਾਲ ਰਾਜ ਦੀਆਂ ਜ਼ਮੀਨੀ, ਪਾਣੀ ਬਾਰੇ ਬਣੀਆਂ ਸਹਿਯੋਗੀ ਕਮੇਟੀਆਂ ਦੇ ਮੈਂਬਰ ਹਨ ।
ਨਿਰਦੇਸ਼ਕ ਪਸਾਰ ਸਿੱਖਿਆ ਡਾ. ਜਸਕਰਨ ਸਿੰਘ ਮਾਹਲ ਨੇ ਡਾ. ਰਾਜਨ ਅਗਰਵਾਲ ਦੇ ਸਮਰਪਣ ਅਤੇ ਲਗਨ ਦੀ ਪ੍ਰਸ਼ੰਸਾ ਕਰਦਿਆਂ ਇਸ ਪੁਰਸਕਾਰ ਲਈ ਉਹਨਾਂ ਨੂੰ ਵਧਾਈ ਪੇਸ਼ ਕੀਤੀ ਹੈ । |