ਪੀਏਯੂ ਲੁਧਿਆਣਾ ਵੱਲੋਂ ਸੀਐਸਕੇ ਐਚਪੀਕੇਵੀ, ਪਾਲਮਪੁਰ ਦੇ ਸਹਿਯੋਗ ਨਾਲ ਮਾਊਂਟੇਨ ਐਗਰੀਕਲਚਰ ਰਿਸਰਚ ਐਂਡ ਐਕਟੈਂਸ਼ਨ ਸੈਂਟਰ ਸਾਂਗਲਾ ਜ਼ਿਲ੍ਹਾ ਕਿਨੌਰ ਵਿੱਚ ਦੋ ਸਿਖਲਾਈ ਕੈਂਪ ਕਬੀਲਾਈ ਕਿਸਾਨਾਂ ਲਈ ਲਗਾਏ ਗਏ । ਇਹ ਕੈਂਪ ਕਿਨੌਰ ਜ਼ਿਲ੍ਹੇ ਦੇ ਦੂਰ ਦਰਾਜ ਖੇਤਰਾਂ ਵਿੱਚ 26 ਅਤੇ 27 ਅਕਤੂਬਰ ਨੂੰ ਲਗਾਏ ਗਏ । ਕੀਟ ਵਿਗਿਆਨ ਵਿਭਾਗ ਪੀਏਯੂ ਦੇ ਮੁਖੀ ਡਾ. ਪ੍ਰਦੀਪ ਕੁਮਾਰ ਛੁਨੇਜਾ ਨੇ ਦੱਸਿਆ ਕਿ ਇਹ ਸਿਖਲਾਈ ਪ੍ਰੋਗਰਾਮ ਟਰਾਈਬਲ ਸਬ ਪਲਾਨ ਪ੍ਰੋਗਰਾਮ ਅਧੀਨ ਭਾਰਤੀ ਖੇਤੀ ਖੋਜ ਪ੍ਰੀਸ਼ਦ ਦੀ ਸਹਾਇਤਾ ਨਾਲ ਲਗਾਏ ਗਏ ਸਨ । ਸੀਨੀਅਰ ਐਕਰੋਲੋਜਿਸਟ ਡਾ. ਮਨਮੀਤ ਸਿੰਘ ਭੁੱਲਰ ਅਤੇ ਡਾ. ਪਰਮਜੀਤ ਕੌਰ ਨੇ ਇਹਨਾਂ ਪ੍ਰੋਗਰਾਮਾਂ ਨੂੰ ਆਯੋਜਿਤ ਕੀਤਾ ਜਿਨ੍ਹਾਂ ਵਿੱਚ ਬਾਗਬਾਨੀ ਫ਼ਸਲਾਂ ਵਿੱਚ ਕੀਟ ਪ੍ਰਬੰਧਨ ਸੰਬੰਧੀ ਜਾਣਕਾਰੀ ਲੀਉ ਅਤੇ ਸਾਂਗਲਾ ਪਿੰਡਾਂ ਦੇ ਕਿਸਾਨਾਂ ਨੂੰ ਦਿੱਤੀ । 100 ਤੋਂ ਵਧੇਰੇ ਕਿਸਾਨਾਂ ਨੇ ਇਸ ਦੌਰਾਨ ਸਿਖਲਾਈ ਪ੍ਰਾਪਤ ਕੀਤੀ ਜਿਨ੍ਹਾਂ ਵਿੱਚ ਦੋਵਾਂ ਪੰਚਾਇਤਾਂ ਦੇ ਮੁਖੀ ਵੀ ਸ਼ਾਮਲ ਸਨ । ਪ੍ਰੋਗਰਾਮ ਵਿੱਚ ਭਾਗ ਲੈਣ ਵਾਲੇ ਕਿਸਾਨਾਂ ਨੂੰ ਜ਼ਰੂਰੀ ਸਾਜ-ਸਮਾਨ ਵੰਡਿਆ ਗਿਆ ।